22, ఫిబ్రవరి 2023, బుధవారం

చెప్పనా..?

 ఏమని చెప్పను ఎన్నని చెప్పను..?

మన freshers day  రోజున అనుకోకుండా వేసిన కిటుకులు తెలిసిన చిటపట చినుకుల పాట చిందులకు వచ్చిన చప్పట్ల మోత గురించి చెప్పనా.. ?

అమరావతి పర్యటనలో ఆహ్లాదంగా గడచిన ఆ మధురానుభూతుల మాధుర్యాల గురించి చెప్పనా..?

హాస్టల్లో చిరు పాట చిత్రలహరిలొ రాగానె చిందేసిన గెంతుల గురించి చెప్పనా..?

చంద్ర కళ ఈ చంద్ర చెల్లికి కొన్న నైటీ సహకారపు ఆనవాల్లు చెప్పనా..?

general quiz లో  మొదటి బహుమతి సాధించిన విజయ దరహాసాల  vizag trip గురించి చెప్పనా..?

మొదటిసారి జీవితంలో Fail అన్న పదాన్ని పరిచయం చేసిన EM Subject గురించి చెప్పనా..??

BSN reDDi class లో బిక్కు బిక్కు మంటూ బిత్తరపోయిన సంఘటనలు గురించి చెప్పనా..?

దొంగ చాటుగా గోడ దూకి విజయలక్ష్మి థియేటర్లో చూసిన second shows  గురించి చెప్పనా..?

చంద్ర మౌళీ గారు చెప్పే అంతరిక్షపు గ్రహాల్లో నే వూహించుకున్న నా స్వప్న సుందరి గురించి చెప్పనా..?

College Annual Day కు చిరు పాటకు Stage మీద అడుగుపెట్టి లయబద్దంగా వేస్తున్న అడుగులు అర్థాంతంగా ఆగిపోయి రెచ్చిపోయిన కుల విషనాగుల కాట్లకు ఈ కాటుబోయిన ఎంతలా వ్యధ చెందాడొ చెప్పనా..?

వీడ్కోలు వేదనలో విడవలేక స్నేహితులను కార్చిన కన్నీటి కథ చెప్పనా..?

చివరగా...ఒక్కమాట..

కుల కౌగిట్లో నలిగిన నా సహ విద్యార్థుల  వేదన గురించి ఈ ఒక్క వాక్యంలో నే చెప్పగలనా? 

వదిలితే వందపేజీలు నిరాఘాటంగా రాసి ఆ క్షుద్రమూకల దౌర్జన్యాలను,వారి ఆగడాలను ఓ మహా కావ్యంగా వేయి పడగలా కాకున్నా ఓ వంద పడగలా అయినా రాయగలనని ..మీ

-చంద్ర కాటుబోయిన  




ఆటా పాటా అన్నిట్లో మేటీనే ..

బరిలో దిగితే లేడెవరూ పోటీనే ..

మాటా మాటా కలిపాడంటే 

నిదురన్నది లేదే నీ వల్ల ఓ పిల్ల

బాదైతుందే నీ యాదిల నా గుండెల్ల

నీ పేరేందో దెలువది

నీ ఊరెందో దెలువది

నువ్ యేడుంటవో దెలువది

నువ్ ఎట్లుంటవో దెలువది

ఐనా నా ఎద సాటు

నీ బొమ్మే గీసుకున్న

నీ పేరే రాసుకున్న

నిదురన్నది లేదే నీ వల్ల ఓ పిల్ల

బాదైతుందే నీ యాదిల నా గుండెల్ల

నిదురన్నది లేదే నీ వల్ల ఓ పిల్ల

బాదైతుందే నీ యాదిల నా గుండెల్ల


నిన్నూ జదివిన నుంచి నన్నూ నేను మరిసిన

అన్నీ ఇడిసిపెట్టిన నిన్నే ఒడిసి పట్టిన

నిన్నూ జదివిన నుంచి నన్నూ నేను మరిసిన

అన్నీ ఇడిసిపెట్టిన నిన్నే ఒడిసి పట్టిన

ఎక్కడనా చేతినుంచి జారిపోతవో అని

గుబులైతాందే గుండె బరువైతాందే

పరిసానైతాందే పాణమెళ్లి పోతాందే



నిన్ను తెలియగ నెంచి

నన్ను నేను మరిసిన

అంతట నిన్ను గాంచిన

అందరి మంచి గోరిన 


ఎప్పుడు ఈ గ్యానం నా మతిలో నిలిచేలా

నిండి పోరాదే

నా గుండెల ఉండి పోరాదే

చివరకు నేనే నువ్వై మిగిలి పోవాలే


21, ఫిబ్రవరి 2023, మంగళవారం

అంతరంగం ...

 అంతరంగం ...


అందంగా ముస్తాబు చేసి అంగట్లో పెడితే ..

అలంకరణ కోసం కాబోలు .. అని  గర్వపడ్డా ..

అద్దాల గదిలో మువ్వురం ఇరుక్కుని 

ఊసుపోని కబుర్లలో ఉక్కిరి బిక్కిరవుతున్నాం ..

అంతలోనే కిడ్నాప్ చేస్తున్నారేమో అనేంతగా 

అమాంతం అరచేత్తో ఒడిసిపట్టుకొని ఆరుబయటికి అరుదెంచారు ఎవ్వరో ..

కారులో షికారుకు తీసుకొచ్చారులే అని 

సంబరపడ్డాం ..

క్షణమాలస్యం ..మా గది తలుపులు తెరిచారు .. అంతే 

ఒక్కసారిగా రెక్కలొచ్చీ గువ్వలా ఎగిరి దుమికాము .. 

పరిసరాల పచ్చని చెట్లు పలకరించినట్టు 

పిల్ల తెమ్మెర నాదాల పిలుపులతో పులకరించినట్టు 

మా ఆనందం ఆకాశాన్నంటేలోగా ..

ఏదోసుతిమెత్తగా తాకింది ..తోశారా అని అనుకొనేంతలో ..ఎగిరి అటుపడ్డా ..

అటుపక్కనుండి మల్లీ గట్టిగా ఎవరో వీపుపై చరిచినట్టు ఉలిక్కిపడ్డా ..అంతే 

ఇటువైపు నుండి మరింత కసిగా మరొకడు ..

అంతకంటే బలంగా ఇంకోడి బాదుడు ..

ఒకడేమో గింగిరాలు తిప్పడం 

మరొకడు ఊచకోతనే నయమన్నట్టు కోయడం ..

ఇలా ఎడా పెడా అటూఇటూ  కొడుతుంటే ...ఆడుకుంటుంటే .. 

అప్పుడర్థమైంది ..

మా అయువు ఈ ఆటగాళ్ళు అనుకొనే వేటగాళ్ళ చేతిలో మూడిందని ..

నాతోటి సోదరులకు కూడా ఈ ముప్పు తప్పదని ..

కొన్ని ఘడియలకు నీరసంగా కొన ఊపిరితో ఉన్న మమ్మల్ని .. 

చెత్త బుట్టలో వేయడంతో మా ప్రాణాలు .. అలా గాలిలో ..కలిసిపోయాయి 

ఇకపై వద్దు ఈ బంతి జన్మ ..ముద్దు ఆటగాడి జన్మ  

మీ 

🎾

నటశేఖరా .. ! నివాళి 🙏🏻

 ధైర్యం మూగబోయింది...

సాహసం కన్ను మూసింది..

ఉదారతకు ఊపిరాగింది..

తేనె మనసులతో తెలుగు వీర లేవరా అంటు తెలుగు వారి గుండె తట్టిన మగధీరా ..

లవ్ బాయ్ , గూడ్ బాయ్ లాంటి మూస పాత్రలకు చరమగీతం పాడిన కౌబాయ్ గా ..

తెలుగు నిర్మాతల పాలిటి కల్పతరువుగా 

జనాదరణలో అసాధారణ ఆంధ్రా జేమ్సు బాండ్ గా ..

సినీ జగత్తులో విప్లవాత్మక సాంకేతికతకు చిరునామాగా ..

తెలుగు చలన చిత్ర సిం హసనం పై తెగువ కల్గిన బుర్రి పాలెం కుర్రోడుగా ..

తెలుగు కళామతల్లి ఒడిలో శాశ్వత నిద్రలోకి జారుకున్న నటశేఖరా .. 

అశ్రువులు బాసిన నయనాలతో .. భావోద్వేగాలు నిలువెల్లా దహించుకుపోయే దోసిల్లతో అర్పిస్తూ ఇదే ఘట్టమనేనికి ఘనమైన కన్నీటి నివాళి 🙏🏻

Naalo nenu

 

మునుపెన్నడూ హృదయం ఇంతగా ద్రవించనే లేదు 

కనులెప్పుడూ ఇంతగా వర్షించనూ లేదు 

తనువెన్నడూ ఇలా తల్లడిల్లిందీ లేదు 

ఇంతలా ఎందుకనో ..? 

మాటలేమో ..

     మంచులో కూడా సెగలు రగిల్చే తూటాలు 

     కంచు స్వరాన నరాలు తెంపే కరుకైన చుర కత్తులు 

     అణచలేని ఆవేశాన వివేకమడుగంటి విసిరే పిడి బాకులు

      ఎందరున్నా ఎదుటివాడి గుండెల్లో గుచ్చే గునపాలు 

మరి మనసెందుకిలా ..

   పొరుగింటి తల్లి కన్నీరు మున్నీరవుతున్నా ..

   అప్పగింతల వేల ఆడబిడ్డ శోకాలు పెడుతున్నా ..

    అప్పుడే పుట్టిన పసికందు వెక్కి వెక్కి ఏడుస్తున్నా ..

     కట్టుకున్న అమాయక చిన్నది  కంట తడి కాంచినా .. 

నిలువెల్లా కరిగిపోతా 

తలుపుల్లో మరిగిపోతా 

కన్నీటి కడలిలో జారిపోతా .

కడకు చిత్రంగా ....

 ఏ చిత్రమందైనా చీమంత చింతనా భరిత సన్నివేశమందును 

అంతులేని నిర్వేదానికి లోనవుతా  

కన్నీటి ధారలలో తడిసి బయటికి కనపడనీయని తుఫానులో సమిధనవుతా ..

వెరసి నాదైన సమాజాన కదలిపోతా కలసిపోతా .. 

-చంద్ర

Tennis-Beauty

 కను చూపు మేరలో .. కళ్ళకు కట్టినట్టు ..

అందమైన బంతాటలో ఆనందాలు విరబూసినట్టు 

కొట్టే ప్రతి షాటుతో కోరికలు చెలరేగేట్టు 

టెన్నిస్ ఆటతో వసంతాలు వచ్చినట్టు 

పున్నమి వెన్నెల ఆటలో పూనకాలొచ్చినట్టు 

ఆడే మన ఆటలో ఆనందాల అంచులను తాకినట్టు .. 

ఏమిటీ ఆట కనికట్టు .. ఎప్పుడీ ఆట కట్టు ? 

ఈ ఆట కనిపెట్టిన ఓ బ్రహ్మ .. ధన్యమైంది మా జన్మ 🙏🏻

Federer -Fever-Retirement

 ఏ మాయ చేశావో ..

ఏ మంత్రం వేశావో ..

అంతవరకూ ఆ ఆట ఒకటుందని మాత్రమే తెలుసు ..కానీ 

నీవల్ల ఆ ఆటకే అందం తెచ్చావ్,

తెలియని మోహం పెంచావ్,

తీరని దాహం తీర్చ్చావ్ వెరసి 

ఆ ఆటకే వన్నె తెచ్చావ్ ..

నీ చేతిలో ఆ రాకెట్ మరో మంత్రదండం కాదుగా..? మరి అలా ఎలా అడగలిగావ్ .. ?

ఆ బంతి నువ్ చెప్పినట్టే అలా వింటుందేంటి ? 

అదేదో వేసిన ఆ రేఖలనే వెంటాడుతున్నట్టు..

ఓహ్..వశీకరణ మంత్రం ఏదైనా తెలిసేమో..నీకు..

మరి..ఆ సర్వ్? ' టీ ' ప్రియురాలు కాబోలు .. ఎప్పుడూ అక్కడే పడతానంటది.. 

ఆ డ్రాప్స్ ..సంగతేంటి ..? ఇప్పటికీ ఇంత పదును ఎవ్వరూ చూపలేరనేగా వాటి మిడిసిపాటు ?

ఆ ఎదుటివాడి మీద కాసింత కనికరం కూడా చూపవా..? 

మరిచిపోయా .. ఆ బ్యాక్ హ్యాండ్ ఏంటయ్యా ..? 

అదేదో మయుడే  శిల్పం చెక్కినట్టు , 

అర్జునుడు బాణాన్ని సంధించినట్టు , 

నయనతారే బంతిలా మారి ప్రత్యర్థికి సెగలు రగిలించేట్టు .. ఏంటా ఆ ఆట ..? 

పవర్ గేమొచ్చినా .. రాడిక్ రచ్చజేసినా 

సఫిన్ సందడి చేసినా , నాదల్ నాటుగున్నా , జోకర్ విరుచుకు పడినా ..

నీ ఆట సొగసు ముందు నిలువతరమా..? 

అసలు .. అంత హోరాహోరి పోటీలలో తడిసి ముద్దయ్యే ఆటగాళ్ళు ఎందరో .. మరి .. నీ ఆట ఏంటయ్యా.. 

అపుడే ఇస్త్రీ చేసిన షర్ట్ వేసుకునట్టు .. ఆది నుండి అంతం వరకు నీ మడతలు చెరగవ్ , నవ్వులు చెదరవ్ .. ఇలా ఎలా ?

స్విస్ నాణెము పై కూడా హడావిడి చేస్తున్నవంట..ఈ జగతిలో  అలా నీలా బతికున్నపుడే ఎవరెస్టు స్థాయి ఎవరెదిగారులే..

ఏదేమైనా .. మా మనసులలో చెరగని ముద్ర వేశావ్ ..ఇంతలా అలరించిన ఆటగాడు ఇకపై ఆడబోడని తెలిసి మా కనులను తడిపావ్ ..

చివరగా ..ఒక జీవిత కాలానికి 

టెన్నిస్ ఆటకే ప్రతీకగా నిలిచావ్ .. 

All the best federer .. never relieve your fever🙏🏻

కొత్త సంవత్సర శుభాకాంక్షలతో.. 2023

 


ఎన్నో ఏళ్ళుగా చూస్తూనే ఉన్నా 

అయినా ..తన ముస్తాబుని చూసి ఒకింత అచ్చెరు వొందక మానదు

అలా...వెలుగు రెక్కలను తొడుక్కుని  

నిలువెల్లా కాంతి పుంజాలు పులుముకొని 

అభేద్య సంద్రాల మీదుగా సంతోషాలను నింపుకొని 

ఆశల పల్లకీలో ఆశయాల సాధనకు ఉపక్రమిస్తూనే ఉంది.

తుషార సమీరాలను స్పృశిస్తూ ఉషోదయా తిమిరాలను నిరసిస్తూ

పంచ కళ్యాణి వేగంతోటి విశ్వమంతా భ్రమిస్తూనే ఉంది. 

ప్రతి ఇంటిల్లిపాది గుమ్మం తడుతుంది.

ప్రతి కంటి తడిని తుడుస్తుంది . 

ఆరుగాలం ఆనందాలను ఇనుమడింప జేస్తుంది 

సకల జనులకు సముచిత స్వాగతం పలుకుతూ కొత్త సంవత్సరం మన జీవితాల్లో తొంగిజూడాలని.. 

-కొత్త సంవత్సర శుభాకాంక్షలతో.. 


చంద్ర కాటుబోయిన